Аз ҳар гӯша – шӯхиҳои “ҷиддӣ”

ГАИ БДА
Аз маҷаллаи Хорпуштак

Нависанда деҳқонест, ки дар панҷ-шаш моҳ ҳосил мекорад. Мунаққид комбайнест, ки дар ду-се соат онро даравида мепартояд.

Азбаски шамъу парвонагӯӣ дар адабиёт аз ҳадди эътидол гузашт, чароғи барқиро офариданд.

Ҳоло ҳаҷми асари адибро на илҳом, балки эҳтиёҷи иқтисодиаш муайян мекунад.

Аз эроди мунаққид: -Суханонаш бисёр урёнанд. Гӯё ки аз ҳаммом репортаж бурда истода бошад.

Борони сел борида, киштаҳоро хароб кард. Муаллифи “Рез, борони фаровон”-ро ба ҷавобгарӣ кашиданд.

Ба ҳикоя касе бовар накард. Маҷбур шуд, ки худро афсона муаррифӣ кунад.

Маслиҳат ба муаллифон: -Ба навиштаҳоятон бисёртар аломати хитоб монед, то хонандаатонро хоб набарад.

Абдурауф Муродӣ